फोरमायथि (Introduction)
ब्रजेन्द्र कुमार ब्रह्मआ बर' थुनलायाव सासे गोदान मुगानि मुंदांखा थुनलाइगिरि । बिथाङा गाहायै नेरसोनारि खन्थायगिरि, सावरायगिरि आरो “बर' थुनलाइ आफाद” नि बारग' आफादगिरिमोन। बिथाङा गावनि खन्थाइ बिजाब “बायदि देंखो बायदि गाब” नि थाखाय 2015 मायथाइयाव “साहित्य एकाडेमि बान्था” मोन्नो हादोंमोन। बिथाङा बर'थुनलायाव नेरसोनारि (Symbolic) खन्थाइखौ सिगां जोनोम होग्रोदोंमोन। |
| गेदेमा थुनलाइगिरि ब्रजेन्द्र' कुमार ब्रह्मनि सावगारि |
| ब्रजेन्द्र' कुमार ब्रह्मनि जिउनि सोमोन्दै सुंद’यै (Brajendra Kumar Brahma Overview) | |
|---|---|
| मुं (Name) | ब्रजेन्द्र' कुमार ब्रह्म (Brajendra Kumar Brahma) |
| जोनोम (Born) | 1 जुन 1943 (June 1, 1943) |
| थैनाय (Died) | 5 डिसेम्बर 2019 (December 5, 2019) |
| बिसि (Wife) | खौसाल्या ब्रह्म (Kaushalya Brahma) |
| बिमा (Mother) | अनदाब ब्रह्म (Dondaram Brahma) |
| बिफा (Father) | दन्दाराम ब्रह्म (Andab Brahma) |
| गामि (Village) | सालानि बाथाबारि, दथमा (Chalani Batabari, Dotma) |
| जिल्ला (Dist) | क'कराझार (Kokrajhar) |
| सोलोंथाइ (Qualification) | बि.ए. (बि.टि.) (B.A, B.T) |
| देरसिन बान्था (Award) | साहित्य एकाडेमि बान्था (Sahitya Akademi Award) |
ब्रजेन्द्र' कुमार ब्रह्मनि आगु जिउ आरो सोलोंथाय (Early Life and Education of Brajendra Kumar Brahma):
गोदान मुगानि बर' थुनलाइगिरि, ब्रजेन्द्र कुमार ब्रह्मनि जोनोमा 1 जून 1943 मायथाइयाव आसाम रायजोनि बि.टि.आर. नि सिङाव थानाय क'कराझार जिल्लानि दथमा नि सिङाव चलानी बाथाबारियाव जादोंमोन। बिथांनि बिफानि मुङा द'न्दाराम ब्रह्म आरो बिमानि मुङा अनदाब ब्रह्म मोन। बिथांनि बिसिनि मुङा खौसाल्या ब्रह्म मोन।
“साहित्य एकादेमि बान्था” मोननाय ब्रजेन्द्र कुमार ब्रह्मया गोदान मुगानि बर' खन्थाइनि दोरोंखौ दैदेनदोंमोन। बिथाङा गावनि गिबि “अख्रां गंसे नांगौ” खन्थाइ बिजाबखौ सेबखांनायजों लोगोसे बर' खन्थाइनि गोदान दोरोंफोरखौ गायसनदोंमोन। बिथाङा बर' थुनलाइयाव सासे मुंदांखा नेरसोनारि खन्थाइगिरि। बिथाङा बर' सानबोलावरि थुनलायनि सासे मुंदांखा लिरगिरिबो। बिथांनि लिरबिदांफोर जेरै रायथाइ, थुनलायारि सावरायनाय, जिउखौरां, बिबुंथिफोरा गोबां लाइसिफोराव गोसारना दं।
ब्रजेन्द्र कुमार ब्रह्मआ इं 1959 माइथायाव शक्ति आश्रम बकेशनेल गोजौ फरायसालि निफ्राय मेट्रिक पास खालामो। इं 1968 माइथायाव बिथाङा शिलंनि सेन्ट एडमंड्स फरायसालिमा निफ्राय बि.ए. आरो इं 1977 माइथायाव गवालपारा सोरखारि बी. टी. फरायसालिमा निफ्राय बि.टी. फास खालामो।
ब्रजेन्द्र' कुमार ब्रह्मनि खामानि मावनाय (Services of Brajendra Kumar Brahma):
ब्रजेन्द्र कुमार ब्रह्मआ 1970 मायथाइनिफ्राय बनरगाँव गोजौ फरायसालिनि फोरोंगिरि महरै खामानि मावदोंमोन आरो 2000 मायथाइयाव गाहाय फोरोंगिरि महरै बै फरायसालिनिफ्राय आजिरा लादोंमोन। बेनि उनाव गोबां थुनलायारि खामानिफोर आरो समाजारि हाबाफारिफोरजों नांथाबनानै थादोंमोन।
बिथाङा गोबाव समसिम बर' थुनलाइ आफादजों नांथाबनानै खामानि मावदोंमोन। इं 1986-89 आरो 1990-92 निफ्राय बे आफादानो Joint Secretary महरै हाबा मावदोंमोन।
इं 1986-88 नि समाव, बिथाङा बर' लिरगिरि गौथुम (Bodo Writer's Academi)नि लेङाइ-आफादगिरिमोन, बेनि उनाव बेनिनो सासे बोसोनगिरि जादोंमोन, आरो उनाव मोन्नै समफारिनि थाखाय 2002-04 आरो 2005-07 नि समाव बर' थुनलाइ आफादनि आफादगिरिबो जादोंमोन।
बिथाङा दानसेयारि सरासनस्रा गियान (G.K) जायनि मुङा “गोदान गियान” आरो बर' खन्थाइनि दानसेयारि लाइसि “समनि आगान” निबो गाहाय सुजुगिरिबोमोन।
ब्रजेन्द्र' कुमार ब्रह्मनि थुनलाइ सोरजिफोर (Literary Contribution of Brajendra Kumar Brahma):
ब्रजेन्द्र कुमार ब्रह्मआ गावनि जिउखौ बर' थुनलाइयाव बावसोमदोंमोन। बिथांखौ बर' थुनलायनि बिथिङाव सासे गोख्रों आरो मुंदांखा लिरगिरि महरै मिथिनाय जायो। बिथाङा गुबैयै सासे खन्थाइगिरि। बिथाङा नेरसोनारि खन्थाइनि बिथिङाव सासे मुंदांखा खन्थाइगिर महरै गावखौ सिनायथि होनो हादोंमोन। खन्थाइनि अनगायैबो बिथाङा गोबां रायथाइफोरबो लिरलांदोंमोन। गाहायाव बिथांङा लिरनानै सोरजिलांनाय थुनलायारि हाबाफोरनि मोनसे फारिलाइ बानायनाय जाबाय:
ब्रजेन्द्र कुमार ब्रह्मनि खन्थाइ बिजाबनि फारिलाइ (List of Poetry by Brajendra Kumar Brahma):
- “अख्रां गंसे नांगौ”। बे खन्थाइ बिजाबा बिथांनि गिबिसिन खन्थाइ बिजाब जाय इं 1975 मायथायाव ओंखारदोंमोन। बे खन्थाइ बिजाबाव गासै 21 था गुबुन गुबुन खन्थाइफोर दंमोन।
- “आं फैफिनगोन”(1994)।
- “सान मोखाङारि बिबार जानानै” (1994)
- “बायदि देंखो बायदि गाब”। बे खन्थाइ बिजाबखौ बर' थुनलाइ आफादनिफ्राय इं 2012 मायथायाव दिहुनदोंमोन।
ब्रजेन्द्र कुमार ब्रह्मआ सोरजिलांनाय रायथाइफोरनि फारिलाइ (List of Proses By Brajendra Kumar Brahma):
- “थुनलाइ आरो सानस्रि” (1986)
- “रायथाइमाला” (1992)
- “नोजोर आरो सोरजि” (1994)
- “थुनलाइ आरो थुनलाइ” (2004)
- “रायथाइहाला” (2006)
- “थुनलाइ बायदि बायदि” (2009)
- “बिबुंमाला” (2009)
- “साव साबफानाय गोदान सोदोमस्रि” (2015)
- “खबाम दोरोदनाय जिउ” (2015)।
ब्रजेन्द्र' कुमार ब्रह्मनि मान आरो बान्थाफोर (Awards and Honors of Brajendra Kumar Brahma):
ब्रजेन्द्र कुमार ब्रह्मआ गावनि जिउखौ बर' थुनलाइयाव बावसोमदोंमोन। बिथाङा गावनि जिउ समाव बिथांनि थुनलायारि सोरजिलु आरो मुंख'जाथाव समाजारि हाबाफोरनि थाखाय थैनायनि उनाव गोबां बान्थाफोरजों मान होजादोंमोन। गाहायाव बिथांङा मोननो हानाय बान्थाफोरनि मोनसे फारिलाइ होनाय जाबाय:
- इं 1994 मायथायाव बिथाङा गावनि “अख्रां गंसे नांगौ” खन्थाइ बिजाबनि थाखाय बर' थुनलाइ आफादनिफ्राय “समेस्वरि ब्रह्म थुनलायारि बान्था” मोननो हादोंमोन।
- इं 1995 मायथायाव बिथाङा गावनि “सान मोखाङारि बिबार जानानै” खन्थाइ बिजाबनि थाखाय बङाइगाव जिल्ला बर'थुनलाइ आफाद निफ्राय “मुक्ताराम ब्रह्म थुनलायारि बान्था” मोननो हादोंमोन।
- इं 2019 मायथायाव बिथाङा गावनि “रायथाइहाला” मुंनि रायथाइ नि थाखाय साहित्य एकाडेमि आरो करिया सोरखार जों financed खालामजानाय Samsung Electronic निफ्राय “टेगर थुनलायारि बान्था” मोननो हादोंमोन।
- इं 2013 मायथायाव बिथाङा गावनि “बायदि देंखो बायदि गाब” खन्थाइ बिजाबनि थाखाय बर' थुनलाइ आफाद निफ्राय “प्रबन बरगयारी थुनलायारि बान्था” मोननो हादोंमोन।
- इं 2013 मायथायाव बिथाङा बि.टि.सि सोरकार निफ्राय “प्रमद चन्द्र ब्रह्म थुनलायारि बान्था” मोननो हादोंमोन।
- इं 2015 मायथायाव बिथाङा गावनि “बायदि देंखो बायदि गाब” खन्थाइ बिजाबनि थाखाय भारत सोरकार निफ्राय “साहित्य एकाडेमि बान्था”खौ मोननो हादोंमोन।
- इं 2019 मायथायाव बिथाङा गावनि “बायदि देंखो बायदि गाब” खन्थाइ बिजाबनि थाखाय Upendra Nath Brahma (UNB) Trust निफ्राय “उपेन्द्रनाथ ब्रह्म सुबुंथिनि फाइखि बान्था” खौ मोननो हादोंमोन।
ब्रजेन्द्र' कुमार ब्रह्मनि थैनाय (Death of Brajendra Kumar Brahma):
ब्रजेन्द्र कुमार ब्रह्मआ 5 दिसेम्बर 2019 मायथाइयाव क'कराझारनि रुबानथ ब्रह्म चिभिल ह'स्पिटेलआव रुंसारि जादोंमोन। बिथांनि रुंसारि जानायाव बर' थुनलाइ आरो बर' हारिनि थाखाय सुफुंख'हायि खहा जानांदों।
){kind=link}
0 Comments